საკმაოდ მძიმე ჟღერადობა, Linkin Park-ისა და Evanescence-ის ქართული ნაზავი ევროპული საზოგადოებისათვის მისაღები აღმოჩნდა და ხმების დათვლის შემდეგ ჯგუფი Eldrine სიმღერით ”One More Day” ფინალისტ ათეულში გავიდა.

რაც შეეხებათ სხვა მონაწილეებს - საქართველოსთან ერთად 19 ნახევარფინალისტიდან ფინალში მოხვდნენ სერბეთის, რუსეთის, შვეიცარიის, ფინეთის, ისლანდიის, უნგრეთის, ლიტვის, აზერბაიჯანისა და საბერძნეთის წარმომადგენლები.

ყველაზე ორიგინალური, უფრო სწორედ, დამაბნეველი პერფორმანსი საბერძნეთს ჰქონდა - Loukas Giorkas FT. Stereo Mike - საკმაოდ აგრესიული და მძიმე გამოსვლა მაყურებელთა ყურადღების მიღმა არ დარჩენილა და შედეგიც სახეზეა - საბერძნეთი ფინალისტთა სიას შეუერთდა.

გამარჯვების შანსი აქვს აზერბაიჯანსაც - Eldar & Nigar სიმღერით ”Running Scared” ფინალში კონკურენციას გაგვიწევენ.

შემდეგი ნახევარფინალი 12 მაისს გაიმართება და კიდევ ერთი ათეული გამოვლინდება.

საბოლოოდ კი 14 მაისს 56-ე ”ევროვიზიაზე” ერთმანეთს კონკურენციას სულ 25 ქვეყანა გაუწევს - ნახევარფინალში გამარჯვებულ ქვეყნებს საფრანგეთის, იტალიის, გერმანიის, ბრიტანეთისა და ესპანეთის წარმომადგენლები შეუერთდებიან.