მოიშორეთ ზედმეტი ფრაზები !
რჩევა სასარგებლოა. რჩევა უნდა გაითვალისწინო, მაგრამ, არსებობს ფრაზები, რომლებიც ნორმალურად ცხოვრებაში ძალიან გვიშლიან ხელს. თუ თქვენთვისაც ნაცნობია ისინი, სასწრაფოდ მოიშორეთ.
1. „შენც ყველაფერი ისე უნდა გქონდეს, როგორც სხვებს აქვთ", – და, რა აქვთ სხვებს ასეთი? სხვისი მიბაძვით ცხოვრება წარმოუდგენლად რთულია. „ის" კარგად კერავს, „ეს" კარგად აცხობს და „იმან", თურმე, რემონტიც გააკეთა, – არ ნიშნავს იმას, რომ თქვენ არ ვარგიხართ. ნურასოდეს დაუწყებთ ყურებას სხვებს. მათ თავისი ცხოვრება აქვთ, თქვენ – თქვენი და ის ვიღაცის ცხოვრების ასლი არ უნდა გახდეს, მით უმეტეს, რომ თქვენც გექნებათ რაღაც გამორჩეული ნიჭი და ღირსება.
2. „არ აჩვენო, რომ სუსტი ხარ!" – თუ ამ პრინციპით იცხოვრებთ, ძალიან გაგიჭირდებათ. პირიქით, ქალს უხდება სისუსტე და არაფერია ცუდი იმაში, თუ მამაკაცი ამას დაინახავს. „გამოუშვით" უარყოფითი ემოციები, იტირეთ, როცა ტირილი მოგინდებათ – მამაკაცს თქვენი ცრემლებიც უნდა უყვარდეს. ნუ დააგროვებთ ნეგატივს და თუ იმასაც მოახერხებთ, რომ მოაწონოთ მამაკაცს თქვენი სისუსტე – ეს უკვე ნიჭია!
3. „არავინ არის იმაზე უკეთესი, ვიდრე ჩანს, ან შენ მას ხედავ", – ეს პოზიცია აუცილებლად დაგაკარგვინებთ ადამიანებს. რას ნიშნავს ფრაზა „არასოდეს არავის დაუჯერო?" – ასე ხომ ვერ იცხოვრებთ. თუ ყველა ადამიანს, რომელიც ცხოვრების გზაზე შეგხვდებათ, ეჭვით დაუწყებთ ყურებას, სულ მარტო აღმოჩნდებით. გახსოვდეთ: ჯობია, ხელი ერთხელ დაიწვათ, ვიდრე მთელი სიცოცხლე ცეცხლთან მიკარების გეშინოდეთ.
4. ნუ „გადავარდები" ბავშვობაში, დასერიოზულდი! დროა, გაიზარდო!
არა! ის, ვისაც დიდხანს შეუძლია, დარჩეს ბავშვად, არასოდეს დაბერდება. არაფერია იმაში ცუდი, თუ ზოგჯერ ბავშვურად იცელქებთ. პირიქით, თავს გაცილებით კარგად იგრძნობთ და პრობლემებსაც ადვილად მოერევით. შეცდომები გამოცდილების დაგროვებაში გვეხმარება. ამიტომ, მოეშვით, ნუ იქნებით დაძაბული და ყველაფერი ადვილად გამოვა!
|
