11-12 ივნისს იპოდრომზე მუსიკალური ფესტივალი "თბილისი Open Air" გაიმართება.
მასში როგორც საქართველოდან, ისე ბელგიიდან, საფრანგეთიდან, ინგლისიდან 20 მუსიკალური ბენდი მიიღებს მონაწილეობას.
ფესტივალის მზადებასთან დაკავშირებით და საფესტივალო ინფრასტრუქტურის მშენებლობის სანახავად მედიის წარმომადგენლები იპოდრომის ტერიტორიაზე დღეს, 15.00-ზე შეიკრიბებიან.
საფესტივალო ქალაქის ფარგლებში, რომელიც 26 ათას კვადრატულ მეტრზეა განლაგებული და 11 ივნისს, 12:00 საათიდან მიიღებს სტუმრებს, ფესტივალის სტუმრებისთვის კვების ობექტები, გასართობი და რეკრეაციული ადგილები მოეწყობა.
"გლობალური ფესტივალების საუკეთესო ტრადიციების გათვალიწინებით, გვინდა, ღონისძიება საინტერესო იყოს არა მხოლოდ მუსიკალური კუთხით, არამედ დასვენების, გართობის და დროის საინტერესო გატარების მსურველებისათვის. შაბათ-კვირას იპოდრომი საუკეთესო ადგილია იმისთვის, რომ გემოვნებიანი მუსიკის პარალელურად, განსაკუთრებული სიამოვნება მიიღოთ გარემოსგან და ინფრასტრუქტურისგან, რომელსაც ფესტივალი გთავაზობთ",- განაცხადა ფესტივალის ორგანიზატორმა ვახო ბაბუნაშვილმა.
ფესტივალის ერთდღიანი ბილეთი 5 ლარი ღირს.
შეგახსენებთ, რომ "თბილისი Open Air" პირველად 2009 წელს ჩატარდა. მან განსაკუთრებული გამოხმაურება ჰპოვა როგორც ადგილობრივ, ისე საერთაშორისო მედიაში.
ფესტივალი გლობალური ღონისძიების სახელს ინარჩუნებს და მისით დაინტერესება საერთაშორისო მუსიკალურ საზოგადოებაში განსაკუთრებით მაღალია.
"თბილისი Open Air" 2011 წლიდან საერთაშორისო მუსიკალურ ორგანიზაციაში - შონიცბიდს არის გაწევრიანებული, რომლის მიზანს დამწყები და არა მხოლოდ დამწყები ნიჭიერი მუსიკოსების მხარდაჭერა და პოპულარიზაცია წარმოადგენს.
